Howlin' Wolf

Howlin' Wolf
Howlin' Wolf yn canu ym 1972.
Ffugenw	Howlin' Wolf
Ganwyd	Chester Arthur Burnett  10 Mehefin 1910  Clay County, West Point
Bu farw	10 Ionawr 1976  Hines
Label recordio	Chess Records, RPM Records
Dinasyddiaeth	Unol Daleithiau America
Galwedigaeth	gitarydd, canwr, artist stryd, cyfansoddwr caneuon, cerddor
Arddull	y felan
Gwobr/au	Rock and Roll Hall of Fame
Gwefan	http://www.howlinwolffoundation.org

Canwr y felan, gitarydd, a chanwr harmonica Americanaidd oedd Howlin' Wolf (Chester Arthur Burnett; 20 Mehefin 1910 – 10 Ionawr 1976), un o brif gerddorion arddull blŵs Chicago, sydd yn nodedig am ei lais cryg, dwfn.

Ganed Chester Arthur Burnett i rieni Affricanaidd-Americanaidd yn West Point, Mississippi, a chafodd ei fagu ar blanhigfa gotwm. Clywodd felan Delta'r Mississippi a cherddoriaeth wlad draddodiadol y de yn ystod ei blentyndod. Dylanwadwyd arno gan Blind Lemon Jefferson o Texas, Sonny Boy Williamson II, y canwr gwlad ac iodlwr Jimmie Rodgers, a phrif arloeswr melan y Delta, Charley Patton.

Dechreuodd ganu yn broffesiynol yn ei arddegau, a pherfformiodd mewn clybiau bychain ar draws Mississippi yn y 1920au a'r 1930au. Aeth i West Memphis, Arkansas, yn y 1940au a sefydlodd seindorf gyda James Cotton a Junior Parker. Gweithiodd yn droellwr ar yr orsaf radio KWEM yn West Memphis. Yn sgil llwyddiant ei record gyntaf, "Moanin' at Midnight" (1951), symudodd i Chicago ym 1952. Yno, dan arweiniad Howlin' Wolf a Muddy Waters, addaswyd arddull acwstig y Delta at y gynulleidfa drefol drwy drydanu'r felan. Cafodd caneuon Howlin' Wolf eu recordio yn Chicago gan label Chess Records.

Ymhlith ei ganeuon mae "Smokestack Lightnin'", "Dog Me Around", a "Killing Floor". Yn y 1960au cafodd ei gydnabod am ddylanwadu ar grwpiau roc megis The Beatles, y Grateful Dead a The Rolling Stones. Bu farw yn Hines, Illinois, yn 65 oed. Cafodd ei ynydu i'r Blues Hall of Fame ym 1980 ac i'r Rock and Roll Hall of Fame ym 1991.^[1]

1. ↑ (Saesneg) Howlin' Wolf. Encyclopædia Britannica. Adalwyd ar 24 Chwefror 2021.